भुटानको ओलम्पिक कमिटीले थप आठ ओटा एस्ट्रोटर्फ फुटबल मैदान निर्माण गर्ने

थिम्पु— भुटान ओलम्पिक कमिटीले आगामी पाँच वर्षभित्र देशभर आठवटा एस्ट्रोटर्फ फुटबल मैदान निर्माण गर्ने निर्णय गरेको भुटान लाइभले उल्लेख गरेको छ। एस्ट्रोटर्फ फुटबल मैदानमा कृत्रिम घाँसको प्रयोग हुन्छ ।

ओलम्पिक कमिटीको बिहीबार सम्पन्न २४ औं कार्यकारिणी समितिको बैठकले यस्तो निर्णय गरेको हो । भुटान ओलम्पिक कमिटीका अध्यक्ष जिग्याल उग्यान वाङचुकको अध्यक्षतामा भएको बैठकमा ओलम्पिक कमिटीले पाँच जिल्लामा थप पाँचवटा बहुउदेश्यीय हल निर्माण गर्ने योजना रहेको बताए ।

भुटान लाइभ अनुसार भुटान ओलम्पिक कमिटीले हा, गेलेफु, झेमगाङ, गासा, वाङ्डु फोड्रङ, सामत्से, लुएन्टसे र पेमा गात्शेलमा एस्ट्रो टर्फ फुटबल मैदानहरू विकास गर्ने योजना बनाएको छ।

यी फुटबल मैदान बनाउन ४० लाख अमेरिकी डलर लाग्नेछ ।

त्यसैगरी हा, मोङ्गर, थिम्पु, गासा र वाङ्डु फोड्रङमा पनि करिब ४५ लाख अमेरिकी डलर लागतमा मल्टि स्पोर्ट्स हल निर्माण गर्ने योजना ओलम्पिक कमिटीको छ ।

बैठकले बीओसीका सल्लाहकार किन्जाङ दोर्जीको नेतृत्वमा विभिन्न पूर्वाधार विकास आयोजनाहरूको मूल्याङ्कन र प्राथमिकताका लागि एक उपसमिति पनि गठन गरेको छ।

प्रस्तावित सबै पूर्वाधारका लागि सरकारले बजेट विनियोजन गर्न नसक्ने अवस्थामा पनि आयोजनालाई प्राथमिकतामा राख्नुपर्नेमा पनि कार्यकारी समिति सदस्यहरूले जोड दिएका छन् ।